Um okkum, Skilling

Familjufyritøkan Skilling byrjaði 1. februar 1923 í Bringsnagøtu í Havn, tá Andreas A. Arge, nevndur Skilling, sum 26 ára gamal yvirtók handilin eftir pápabeiggjan Eliesar Arge, ursmið, í Klokkarastovu.

Frammanundan hevði Skilling verið í læru hjá pápabeiggjanum, sum í Danmark hevði lært til urmakara og optikara, og tá pápabeiggin doyði í 1921, hevur ligið væl fyri hjá Skilling at taka við handlinum og verkstaðnum eitt sindur yvir eitt ár seinni.

Sambært kundabók var fyrsti kundin hjá Skilling Johannes Vang úr Kvívík, sum fyrsta upplatingardagin keypti frá fyritøkuni, ið umframt at selja og umvæla m.a. ur, klokkur, stell og brillugløs eisini hevði eftirlit  ið skipstólum. Áðrenn skip sluppu til fiskiskap, skuldu eitt nú kumpass, kronometur og sekstantar eftirhyggjast og góðkennast hjá ursmiði.

Fyritøkan hjá Skilling helt til ymsastaðni í býnum, eitt nú í Niels Finsens gøtu og Sjúrðargøtu, og undir krígnum búði Skilling við familju eitt bil í Húsavík, haðani konan var.

Hvaðani navnið Skilling stavar, er ógreitt, men fólk kallaðu handilin hetta á mannamunni, hóast hann alment æt Andreas A. Arge. Tað var ikki, fyrr enn fyritøkan flutti úr Sjúrðargøtu oman á Áarvegin, í niðastu hædd í Hotel Hafnia, í 1951, at Skilling sjálvur fór at brúka hetta heitið. 

Tá Skilling doyði í 1970, yvirtóku báðir synirnir Jákup Andreas og Dagfinn Arge handilin sum Skilling Optik, og sama árið flutti hann yvir í ein nýggjan bygning í Bøkjarabrekku, sum Jákup Andreas hevði latið bygt.

Sum uppgávurnar eru blivnar fleiri, og tað tí er blivið meir krevjandi at veita eina holla tænastu, hevur handilin síðani umleið 1980 verið ein optikarafyritøka burturav.

Í 1983 lat Skilling Optik upp ein handil afturat í SMS, og tá koyrivegurin var gjørdur í Bøkjarabrekku, gjørdist verri at hava handil har vegna stóru bilferðsluna, so synirnir gjørdu av at flyta handilin í 1990 nakrar metrar úr brekkuni oman í Niels Finsens gøtu 23.

Jákup Andreas var í mong ár ímyndin av Skilling Optik, og í 1996 bleiv nýtt partafelag gjørt, har dóttir Jákup Andreas, Heidi Arge, yvirtók partin hjá pápanum.

Heidi Arge og pápabeiggin Dagfinn Arge vóru í nógv ár leiðarar í hvør sínum Skilling Optik-handli, ávikavist tann í Niels Finsens gøtu og tann í SMS, inntil handlarnir báðir hin 1. mars 2010 løgdu saman, so nú er bara hin eini snotiligi Skilling Optik í SMS.

Skjótt 100 ára gamla fyritøkan hevur í dag 5-6 fólk í starvi og selur alskyns brillur og linsur umframt at veita allar optikktænastur.